Бекободда аёлни ўлдириб, жасадини ҳовлига кўмган эркак 15 йилдан ортиққа қамалди
Фожиа ижтимоий тармоқ орқали танишган эркак ва аёл ўртасидаги навбатдаги жанжалдан сўнг юз берган. Марҳуманинг жасади эса орадан қарийб бир ой ўтиб топилган.
Тошкент вилояти жиноят ишлари бўйича Бекобод шаҳар судида аёлни ўлдириб, жасадини яширишга уринган эркакка нисбатан ҳукм чиқарилди. Бу ҳақда “Zamon” информацион дастурида маълум қилинди.
Суд материалларига кўра, 27 ёшли эркак Instagram орқали турмушидан ажрашган аёл билан танишган. Бир муддат ёзишиб юрган томонлар кейинчалик учрашиб, аёл вояга етмаган ўғли билан эркакнинг уйида яшай бошлаган.
Бироқ улар ўртасидаги муносабатлар узоқ давом этмаган. Судланувчининг кўрсатмасига кўра, аёл спиртли ичимликлар ва психотроп воситаларни истеъмол қилгани сабабли улар ўртасида тез-тез келишмовчиликлар юзага келган.
2025 йил 2 декабрдан 3 декабрга ўтар кечаси навбатдаги жанжал вақтида эркак аёлдан уйини тарк этишни талаб қилган. Судланувчининг айтишича, аёл бунга қаршилик кўрсатган ва можаро вақтида йиқилиб, бош қисмидан оғир жароҳат олган.
Оқибатда аёл воқеа жойида вафот этган. Шундан сўнг эркак жиноят изларини яшириш мақсадида жасадни уйининг орқа ҳовлисига кўмган. Шунингдек, қон излари тушган кийимлар ҳамда марҳуманинг SIM-карталарини йўқ қилган.
Ҳуқуқни муҳофаза қилувчи органлар ходимлари 2025 йил 27 декабрь куни марҳуманинг жасадини аниқлаб, қазиб олган.
Суд ҳукмига кўра, эркак айбдор деб топилиб, 15 йил 6 ой муддатга озодликдан маҳрум этилди.
