Томскдаги колонияда сақланаётган ўзбекистонликлар ҳолидан хабар олинди
Мазкур муассасада 70 нафарга яқин Ўзбекистон фуқароси жазо муддатини ўтамоқда.
Ўзбекистоннинг Новосибирск шаҳридаги Бош консулхонаси дипломатлари Россиянинг Томск вилоятида жойлашган 3-сонли ахлоқ тузатиш колониясига ташриф буюрди. Бу ҳақда “Дунё” ахборот агентлиги хабар берди.
Маълум қилинишича, мазкур муассасада Россия Жиноят кодексининг турли моддалари билан ҳукм қилинган 70 нафарга яқин Ўзбекистон фуқароси жазо муддатини ўтамоқда.
Ташриф давомида ватандошларнинг мурожаатлари, таклиф ва илтимослари тингланиб, уларни қизиқтирган масалалар юзасидан ҳуқуқий тушунтиришлар берилди.
Шунингдек, хорижий давлатлар ҳудудидаги ҳарбий ҳаракатларда иштирок этганлик учун Ўзбекистон қонунчилигида жиноий жавобгарлик белгиланганлиги эслатилди.
Дипломатлар томонидан бир қатор амалий масалалар ҳам жойида ҳал этилди. Хусусан, астма касаллигидан азият чекаётган фуқаронинг зарур тиббий ёрдам олиши таъминланди, икки нафар ўзбекистонликдан янги паспорт расмийлаштириш бўйича аризалар қабул қилинди.
Бундан ташқари, жорий йил май ойида колониядан озодликка чиққанидан сўнг яқинлари билан алоқаси узилган ўзбекистонлик фуқаронинг манзили аниқланиб, бу ҳақда унинг оила аъзоларига маълумот берилди.
Қайд этилишича, Ўзбекистоннинг Новосибирскдаги Бош консулхонаси Россиянинг Сибир федерал округидаги юртдошларнинг ҳуқуқ ва қонуний манфаатларини ҳимоя қилиш ҳамда уларга консуллик-ҳуқуқий ёрдам кўрсатиш бўйича ишларни давом эттирмоқда.
