“Ҳар бир судья эгнидаги мантиясига муносиб бўлиши лозим”— Саида Мирзиёева
Саида Мирзиёева Олий суднинг янги раиси Робахон Маҳмудовани судьялар ҳамжамияти ҳамда ҳуқуқни муҳофаза қилувчи органлар раҳбарларига таништирди.
22 июнь куни Олий суднинг янги раиси Робахон Маҳмудова судьялар ҳамжамияти ҳамда ҳуқуқни муҳофаза қилувчи органлар раҳбарларига таништирилди. Бу ҳақда Президент администрацияси раҳбари Саида Мирзиёева маълум қилди.
“Президентимиз одамлар учун энг муҳим қадриятлардан бири — адолат эканини кўп бор таъкидлаганлар. Жамиятимизда қонунсизлик ва коррупцияга асло ўрин қолмаслиги шарт. Зеро, ривожланиш ва фаровонликка қаратилган ҳар қандай ислоҳот фақат мустақил суднинг ишончли ҳимоясидагина чинакам кучга эга бўлади”, дея ёзди Мирзиёева.
Шунингдек, у ҳозирда Тошкент халқаро молия марказида Англия ҳуқуқига асосланган суд тизими шакллантирилаётганини билдириб, амалдаги судлар ҳам илғор халқаро тажрибаларни ўз фаолиятига жорий этиши муҳимлигини таъкидлади.
"Тизим алоҳида шахсларга боғланиб қолмасдан, кадрлар алмашинувидан қатъи назар, соат механизми каби аниқ ва узлуксиз ишлаши керак. Ҳар бир судья шарафи ва шаънини юксак даражада сақлаган ҳолда эгнидаги мантиясига муносиб бўлиши лозим", деди у.
Якунда у Робахон Маҳмудовага фаолиятида муваффақиятлар тилади.
