Фарғонада 18 ёшли қизни Туркияга сотмоқчи бўлган шахслар ушланди
Жиноий гуруҳ қизни иш ва яхши даромад ваъдаси билан хорижга кетишга кўндирган.
Фарғона вилоятида одам савдосига алоқадор жиноий гуруҳ фаолияти фош этилди. Бу ҳақда ИИВ матбуот хизмати хабар берди.
Аниқланишича, Қува туманида яшаб, ҳозирда Туркиянинг Денизли шаҳрида истиқомат қилаётган аёл Фарғона шаҳрида яшовчи шериги билан олдиндан тил бириктириб, ёш қизларни хорижда юқори даромадли иш ваъдаси билан алдаб, Туркияга юбориш билан шуғулланиб келган.
Жиноий гуруҳнинг навбатдаги нишони Фарғона шаҳрида яшовчи, 2008 йилда туғилган қиз бўлган. Улар қизни Туркияда осон иш топиш ва яхши даромад олиш имконияти борлигига ишонтириб, хорижга кетишга кўндирган. Бироқ ички ишлар органлари томонидан ўтказилган тезкор тадбир натижасида уларнинг ноқонуний режаси ўз вақтида фош этилган.
Мазкур ҳолат юзасидан Ўзбекистон Республикаси Жиноят кодексининг 135-моддаси (одам савдоси) билан жиноят иши қўзғатилиб, тергов ҳаракатлари олиб борилмоқда.
Мутасаддилар фуқароларни хорижда иш таклиф қилаётган шахсларнинг ваъдаларига ишонишда эҳтиёткор бўлишга, уларнинг фаолияти қонунийлигини текширишга ҳамда шубҳали ҳолатлар юзасидан ҳуқуқни муҳофаза қилувчи органларга мурожаат қилишга чақирмоқда.
