Ўзбекистоннинг Эфиопиядаги биринчи элчиси тайинланди

Ўзбекистоннинг Эфиопиядаги биринчи элчиси этиб тайинланган Ашраф Ходжаев Эфиопия Федератив Демократик Республикаси Президенти Тае Атске-Селассиега ишонч ёрлиқларини топширди. Бу ҳақда «Дунё» ахборот агентлиги маълум қилди.

Расмий маросимдан сўнг томонлар Ўзбекистон ва Эфиопия ўртасидаги ҳамкорлик истиқболлари юзасидан фикр алмашди. Эфиопия раҳбари Ўзбекистоннинг мамлакатдаги элчиси тайинланганини мамнуният билан қарши олиб, икки томонлама муносабатларни янада ривожлантириш ва амалий ҳамкорликни кенгайтириш муҳимлигини таъкидлади.

Ашраф Ходжаев учрашув давомида Ўзбекистон Президенти Шавкат Мирзиёевнинг самимий саломи ва эзгу тилакларини етказди. Шунингдек, у савдо-иқтисодий ва бошқа йўналишлардаги ўзаро манфаатли ҳамкорликни кенгайтиришга тайёр эканини билдирди.

Ўз навбатида, Эфиопия Президенти Ўзбекистон раҳбарига икки давлат ўртасидаги алоқаларни ривожлантиришга қаратилган саъй-ҳаракатлар учун миннатдорлик билдириб, ўз тилакларини йўллади.

Маълумот учун, Ўзбекистон ва Эфиопия ўртасидаги дипломатик муносабатлар 1996 йил 15 июлда ўрнатилган.

Ашраф Ходжаев 2024 йил февраль ойидан буён Ўзбекистоннинг Қатардаги элчиси сифатида фаолият юритмоқда. У 2025 йил октябридан бошлаб ўриндошлик асосида Ўзбекистоннинг Жанубий Африкадаги элчиси сифатида ҳам аккредитациядан ўтган.