Меҳнат инспекцияси Самарқанд вилояти ҳокимига огоҳлантириш юборди
Инспекция ўқитувчиларни кўчалар мониторингига мажбурий жалб этиш мажбурий меҳнат ҳолати сифатида баҳоланиши мумкинлигини маълум қилди.
Меҳнат инспекцияси Самарқанд вилояти ҳокими Адиз Бобоевга педагог ходимларни касбий фаолиятига алоқадор бўлмаган ишларга жалб этиш масаласида огоҳлантириш юборди.
Меҳнат инспекцияси амалдаги қонунчиликка кўра педагог ходимларни уларнинг касбий фаолияти билан боғлиқ бўлмаган ишларга мажбурий тарзда жалб этиш тақиқланишини эслатган. Қайд этилишича, мазкур ташаббус амалиётга жорий этилиб, педагоглар ўз фаолиятига дахлдор бўлмаган вазифаларни бажаришга мажбур қилинса, бу мажбурий меҳнат ҳолатларининг юзага келишига сабаб бўлиши мумкин.
Шу муносабат билан Самарқанд вилояти ҳокимига педагогларни касбий фаолиятига алоқадор бўлмаган ишларга жалб этиш қонунчиликка зид экани ҳамда бундай ҳолатлар учун жавобгарлик белгиланганлиги юзасидан расмий огоҳлантириш юборилган.
Инспекция ҳар қандай ташаббусни амалга оширишда амалдаги қонунчилик талабларига қатъий риоя этиш, шунингдек, педагогларнинг ҳуқуқ ва қонуний манфаатларини ҳимоя қилиш зарурлигини таъкидлаган.
Эслатиб ўтамиз, аввалроқ Самарқанд вилояти ҳокими Адиз Бобоев олий таълим муассасалари раҳбарлари билан учрашувда кўчаларнинг тозалиги, дарахтлар ҳолати ва инфратузилма билан боғлиқ масалаларни мониторинг қилиш бўйича айрим кўчаларни олий таълим муассасаларига бириктириш ташаббусини илгари сургани ҳақида хабар берилган эди.
