Россиянинг Украинага ҳужумлари оқибатида саккиз киши ҳалок бўлди
Зеленский ҳужумларни “даҳшатли” деб баҳолаб, Украинанинг иттифоқчиларини мамлакат ҳаво мудофаасини кучайтиришга чақирди.
Россиянинг Украина ҳудудига уюштирган навбатдаги ракета ва дрон ҳужумлари оқибатида камида саккиз киши ҳалок бўлди, 34 киши жароҳатланди. Бу ҳақда Украина расмийларига таяниб Al Jazeera хабар берди.
Президент Володимир Зеленскийга кўра, Днипро шаҳрига берилган ракета зарбаси оқибатида беш киши, жумладан 13 ёшли қиз ҳалок бўлган. Яна 28 киши турли даражадаги тан жароҳатлари олган.
Жароҳатланганларда бош мия шикастлари, ўқ-парча жароҳатлари, суяк синишлари ва портлаш оқибатидаги травмалар қайд этилган.
Запорижжя шаҳрига уюштирилган дрон ҳужуми оқибатида эса яна уч киши ҳалок бўлган, олти киши, жумладан бир бола жароҳат олган. Зеленский, шунингдек, Россия Суми, Одеса, Чернигов, Херсон ва Харкив вилоятларига ҳам зарбалар берганини билдирди.
Украина президенти ҳужумларни “даҳшатли” деб баҳолаб, халқаро ҳамжамиятни мамлакатнинг ҳаво мудофаа тизимини янада кучайтиришга чақирди.
Айни пайтда Кремль Россиянинг тинчлик бўйича позицияси ўзгармаганини маълум қилди. Москва 2024 йилда илгари сурилган талаблар, жумладан Украина қўшинларининг Россия ўз ҳудуди деб ҳисоблайдиган тўртта вилоятдан чиқиб кетиши ҳамда Киевнинг НАТОга қўшилиш режасидан воз кечиши зарурлигини яна бир бор таъкидлади.
Россия президенти Владимир Путин сўнгги интервьюсида ушбу ҳудудларни тўлиқ назорат қилиш мақсадидан воз кечмаслигини айтди. Унинг таъкидлашича, Украина узоқ масофали зарбаларни ўзаро тўхтатиш ва жанговар ҳаракатларни Донецк, Луганск, Херсон ҳамда Запорижжя вилоятлари билан чеклашни таклиф қилган, бироқ Москва бу ташаббусни қабул қилмаган.
