Шавкат Мирзиёев Гурбангули Бердимуҳамедовни таваллуд куни билан табриклади
Телефон мулоқотида Ўзбекистон Президенти унга мустаҳкам соғлиқ, оилавий бахт-саодат, қардош Туркманистон халқига эса тинчлик-осойишталик ва равнақ тилади.
Шавкат Мирзиёев 29 июнь куни Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедов билан телефон орқали мулоқот ўтказди.
Суҳбат аввалида давлат раҳбари Гурбангули Бердимуҳамедовни таваллуд куни билан самимий табриклаб, унга мустаҳкам соғлиқ, оилавий бахт-саодат, қардош Туркманистон халқига эса тинчлик ва равнақ тилади. Ўз навбатида, Туркманистон Халқ Маслаҳати Раиси Президент Сердар Бердимуҳамедовнинг самимий саломини етказди.
Мулоқот чоғида савдо-иқтисодий алоқалар, саноат, энергетика, транспорт ва бошқа устувор йўналишлардаги қўшма лойиҳалар, шунингдек, «Шовот–Тошовуз» чегараолди савдо зонасининг самарали фаолияти алоҳида эътироф этилди. Ҳудудлараро ҳамкорлик, ишбилармон доиралар ва маданий-гуманитар алмашинувларни янада кенгайтириш масалалари ҳам муҳокама қилинди.
Яқинда Ашхобод шаҳрида бўлиб ўтган Ҳукуматлараро комиссия ва Ишбилармонлар кенгаши йиғилишларининг якунлари юксак баҳоланди.
Жорий йил октябрь ойида Туркманистонда бўлиб ўтадиган Марказий Осиё ва Озарбайжон давлат раҳбарларининг саккизинчи Маслаҳат учрашувига тайёргарлик кўриш доирасида минтақавий кун тартибини мувофиқлаштириш ва илгари суришга алоҳида эътибор қаратилди.
