Сурхондарё ва Андижонда электр тизимидаги коррупцион ҳолатларга чек қўйилди
Электр ҳисоблагичи ва хизмат вазифаси эвазига пора олган мансабдорлар қўлга олинди.
Сурхондарё ва Андижон вилоятларида электр таъминоти тизимида коррупцияга оид икки ҳолат фош этилди. Бу ҳақда ДХХ Zamon.uz'га маълум қилди.
Маълум қилинишича, “Ҳудудий электр тармоқлари” АЖ «Энергосавдо» филиали Шўрчи туман бўлими муҳандиси хизмат мавқеини суиистеъмол қилиб, фуқарога тегишли савдо дўконида электр энергиясидан фойдаланиш бўйича аниқланган қоидабузарлик юзасидан расмий далолатномани кўриб чиқмаслик, ишни судга юбормаслик ҳамда янги электр ҳисоблагичини ўрнатиб, рўйхатдан ўтказиб бериш эвазига 1 минг АҚШ доллари талаб қилган.
У дастлаб 200 АҚШ доллари ва 1 миллион 50 минг сўм олган бўлса, Давлат хавфсизлик хизматининг Сурхондарё вилояти бошқармаси ходимлари Ички ишлар органлари ҳамда Иқтисодий жиноятларга қарши курашиш департаменти билан ҳамкорликда ўтказилган тезкор тадбир давомида қолган 500 АҚШ доллари ва 2,4 миллион сўмни олаётган вақтида ашёвий далиллар билан қўлга олинган.
Шунингдек, Андижон вилоятининг Балиқчи тумани электр таъминоти корхонаси бошлиғи ўринбосари хизмат мавқеидан фойдаланиб, корхона ходимларининг ойлик фаолият кўрсаткичларини юқори ташкилотдаги танишлари орқали ижобий баҳолатиб бериш эвазига пул талаб қилгани аниқланган.
Давлат хавфсизлик хизмати ҳамда Бош прокуратура ҳузуридаги Иқтисодий жиноятларга қарши курашиш департаменти томонидан ўтказилган тезкор тадбирда мансабдор шахс 300 АҚШ долларини олаётган вақтида ашёвий далиллар билан ушланган.
Ҳозирда ҳар икки ҳолат юзасидан мансабдор шахсларга нисбатан жиноят ишлари қўзғатилиб, тергов ҳаракатлари давом эттирилмоқда.
