Тошкентда ЙТҲ оқибатида Ласетти иккига бўлиниб кетди
Ҳодисада жабрланганлар ҳолати ҳақида ҳозирча расмий маълумот берилмаган.
Тошкент шаҳрининг Юнусобод туманида содир бўлган йўл-транспорт ҳодисаси оқибатида Ласетти русумли автомобиль жиддий шикастланиб, икки қисмга бўлиниб кетди. Ҳодиса акс этган видеотасвирлар ижтимоий тармоқларда кенг тарқалди.
Тошкент шаҳар Йўл ҳаракати хавфсизлиги бошқармаси матбуот хизмати маълум қилишича, ҳодиса 30 июнь куни соат 05:10 атрофида Амир Темур ва Боғишамол кўчалари чорраҳасида юз берган.
Дастлабки маълумотларга кўра, Амир Темур кўчаси бўйлаб ҳаракатланаётган Ласетти русумли автомобиль ўнг томондан ҳаракатланиб келаётган Киа К5 русумли автомобиль билан тўқнашган. Кучли зарба оқибатида Ласетти автомобили икки қисмга ажралган.
Ҳозирда мазкур йўл-транспорт ҳодисаси юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.
Расмий маълумотда ҳодиса оқибатида жабрланганлар ёки автомобилларда бўлган шахсларнинг ҳолати ҳақида маълумот келтирилмаган.
