Ўзбекистон илк бор Халқаро кимё олимпиадасига мезбонлик қилади
Тошкент шаҳрида 10–19 июль кунлари 58-Халқаро кимё олимпиадаси бўлиб ўтади. Нуфузли мусобақа тарихда илк бор Марказий Осиё мамлакатида ташкил этилмоқда.
Ўзбекистон тарихда илк бор нуфузли 58-Халқаро кимё олимпиадасига (ИЧО) мезбонлик қилади. Мусобақа 2026 йил 10–19 июль кунлари Тошкент шаҳрида ўтказилади.
Mаълумотларга кўра, олимпиадада дунёнинг 90 дан ортиқ мамлакатидан энг иқтидорли мактаб ўқувчилари иштирок этиши кутилмоқда. Иштирокчилар назарий ва амалий йўналишларда ўз билимлари, мантиқий фикрлаши ҳамда илмий тайёргарлигини синовдан ўтказади.
Қайд этилишича, мазкур олимпиаданинг Ўзбекистонда ўтказилиши нафақат мамлакатнинг халқаро илмий майдондаги нуфузини намойиш этиш, балки иқтидорли ёшларни қўллаб-қувватлаш ва илм-фан соҳасидаги халқаро ҳамкорликни янада ривожлантиришга хизмат қилади.
58-Халқаро кимё олимпиадаси Марказий Осиё тарихида илк бор минтақа давлатларидан бирида ташкил этилмоқда.
