Элдор Шомуродовнинг голи ЖЧ-2026 гуруҳ босқичининг энг чиройли голи деб топилди
Футболчининг мундиалдаги тарихий голи ФИФА овоз беришида Месси, Мбаппе ва Винициус Жуниорнинг голларини ортда қолдирди.
FIFА расмий сайтида 2026 йилги Жаҳон чемпионати гуруҳ босқичида урилган энг чиройли голни аниқлаш бўйича ўтказилган овоз бериш якунларига кўра, Ўзбекистон миллий терма жамоаси сардори Элдор Шомуродовнинг Конго ДР дарвозасига киритган голи биринчи ўринни эгаллади.
Мазкур гол гуруҳ босқичининг 3-турида бўлиб ўтган учрашувнинг 10-дақиқасида урилди. Жарима майдонига узатилган тўпга ўз вақтида етиб борган Шомуродов ўткир бурчак остида бўлишига қарамай, тўпни маҳорат билан дарвозабон устидан ошириб юбориб, ҳисобни очганди.
FIFА ушбу голни “сантиметригача аниқ ҳисобланган ва мукаммал ижро этилган зарба” дея эътироф этиб, у Ўзбекистоннинг Жаҳон чемпионатидаги тарихий дебютининг энг ёрқин лаҳзаларидан бири бўлганини таъкидлади.
Овоз бериш якунларига кўра, Элдор Шомуродовнинг голи Лионел Месси, Килиан Мбаппе ва Винициус Жуниор каби жаҳон футболи юлдузлари томонидан урилган голлардан ҳам кўпроқ овоз тўплади.
Эслатиб ўтамиз, Ўзбекистон миллий терма жамоаси ўз тарихида илк бор FIFА Жаҳон чемпионатида иштирок этди. Терма жамоа гуруҳ босқичида Колумбия, Португалия ва Конго ДРга қарши баҳс олиб бориб, турнирни ушбу босқичда якунлаган эди.
