620 млн сўмлик соврин ва жаҳон гроссмейстерлари: “Zakovat-Gambit” финали Тошкентда
Турнирда қатнашиш учун 5 831 нафар шахматчи рўйхатдан ўтган бўлиб, уларнинг 633 нафари аёллар ҳисобланади.
19–23 октябрь кунлари V «Zakovat-Gambit» шахмат турнирининг ҳудудий саралаш босқичлари ўтказилди. Бу йил мусобақада қатнашиш учун 5 831 нафар шахматчи рўйхатдан ўтди. Уларнинг 633 нафари аёллар бўлиб, бу кўрсаткич турнир тарихидаги рекорд сифатида қайд этилди.
Ҳудудий саралашда қатнаша олмаган ёки кейинги босқичга йўлланма ололмаган шахмат ихлосмандлари учун ҳам имконият мавжуд. 24 октябрь куни chess.com платформасида қўшимча онлайн саралаш ўтказилади.
Саралаш босқичларидан муваффақиятли ўтган иштирокчилар 28 октябрь куни ярим финалда беллашади. Энг кучли шахматчилар эса 29–30 октябрь кунлари Тошкентда финал босқичида иштирок этади.
Бу йилги мусобақага дунёга машҳур гроссмейстерлар — венгриялик Петер Леко ва ҳиндистонлик Ҳампи Конеру ташриф буюриши кутилмоқда. Улар шахмат мухлислари учун махсус сеанслар ўтказиб, ўз тажрибалари билан ўртоқлашади.
Турнирнинг умумий соврин жамғармаси 620 миллион сўмни ташкил этади. Иштирокчилар рейтингига қараб бешта гуруҳга ажратилади ва ҳар бир гуруҳда ғолиблик учун кураш олиб борилади.
«Zakovat-Gambit» турнири шахматга қизиқувчиларни бирлаштириш, янги истеъдодларни кашф этиш ҳамда тажриба алмашиш учун имконият яратишга қаратилган.
