Президент Шавкат Мирзиёев давлат ташрифи билан Грузияга боради
Тбилисда Грузия Президенти ҳамда Бош вазири билан музокаралар ўтказилиши режалаштирилган.
Шавкат Мирзиёев Грузия Бош вазири Ираклий Кобахидзенинг таклифига биноан 2–3 июль кунлари давлат ташрифи билан Грузияда бўлади.
Ташриф доирасида Тбилиси шаҳрида Грузия Президенти Михаил Кавелашвили ҳамда Бош вазири Ираклий Кобахидзе билан олий даражадаги музокаралар ўтказилиши режалаштирилган.
Учрашувларда Ўзбекистон ва Грузия ўртасидаги дўстлик ҳамда кўп қиррали ҳамкорлик муносабатларини янада ривожлантириш масалалари муҳокама қилинади. Томонлар сиёсий мулоқотни мустаҳкамлаш, парламентлараро ва ҳудудлараро алоқаларни кенгайтириш, савдо-иқтисодий ҳамкорликни ривожлантириш ҳамда маданий-гуманитар алмашинувларни фаоллаштириш юзасидан фикр алмашади.
Шунингдек, саноат, фармацевтика, кимё, қишлоқ хўжалиги, туризм, энергетика ва ахборот технологиялари соҳаларида қўшма кооперация лойиҳаларини илгари суриш масалаларига алоҳида эътибор қаратилади.
Музокараларда транспорт-логистика йўналишидаги ҳамкорликни кенгайтириш, экспорт географиясини ривожлантириш ҳамда халқаро ва минтақавий аҳамиятга молик долзарб масалалар ҳам кун тартибидан ўрин олади.
Давлат ташрифи якунида икки мамлакат ўртасидаги ҳамкорликнинг турли йўналишларини қамраб олувчи қатор икки томонлама ҳужжатларни имзолаш режалаштирилган.
