Дамашқда Адлия саройи яқинидаги портлаш оқибатида 10 киши ҳалок бўлди
Айрим фуқаролар портлашга собиқ Президент Башар Асаднинг тарафдорлари алоқадор эканини айтмоқда.
Сурия пойтахти Дамашқдаги кафеда содир бўлган портлаш оқибатида ҳалок бўлганлар сони 10 нафарга етди. Бу ҳақда AP хабар берди.
Портлаш пойтахтдаги асосий суд мажмуаси яқинида жойлашган, асосан адвокатлар ташриф буюрадиган кафеда содир бўлган. Сурия Соғлиқни сақлаш вазирлиги маълумотига кўра, ҳодиса оқибатида яна 21 киши жароҳат олган.
Расмийлар тергов давом этаётганини билдирган. Ҳужумни ким амалга оширгани расман аниқланмаган. Шунга қарамай, дафн маросимида иштирок этган айрим фуқаролар айбни 2024 йил декабрь ойида ҳокимиятдан ағдарилган собиқ президент Башар Асад тарафдорларига юклади. Маросим давомида собиқ режим тарафдорларини жазолашни талаб қилувчи шиорлар ҳам янгради.
Шу куни Дамашқ чеккасидаги Жарамана туманидаги назорат-ўтказиш пунктига ҳам ҳужум уюштирилди. Суриянинг давлат ахборот агентлиги SANA хабарига кўра, қўл гранаталари билан амалга оширилган ҳужум оқибатида уч нафар хавфсизлик ходими яраланган, ҳужумчи ҳалок бўлган ва яна бир гумонланувчи қўлга олинган.
