Фарғонада Туркия қалбаки паспорти ва “права"сини тайёрлаган жиноий гуруҳ ушланди
Ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.
Давлат хавфсизлик хизмати, Иқтисодий жиноятларга қарши курашиш департаменти ҳамда Ички ишлар органлари ҳамкорлигида ўтказилган тезкор тадбир давомида қалбаки хорижий ҳужжатлар тайёрлаш ва сотиш билан шуғулланган жиноий гуруҳ фош этилди.
Аниқланишича, Марғилон шаҳрида яшовчи 1995 йилда туғилган шахс Фарғона шаҳрида истиқомат қилувчи 1990, 1997, 1999 ва 2003 йилларда туғилган тўрт нафар таниши билан олдиндан тил бириктириб, қалбаки Туркия Республикаси фуқаролиги паспорти ва ҳайдовчилик гувоҳномасини мижозга 4 млн сўм эвазига сотаётган вақтида қўлга олинган.
Тезкор тадбир давомида гумонланувчилардан 11 та мобил телефон ва 2 та ноутбук ашёвий далил сифатида мусодара қилинди.
Мазкур ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.
