Грузияда Алишер Навоий ҳайкали очилди

 

Грузияга давлат ташрифи доирасида Шавкат Мирзиёев ҳамда Грузия Бош вазири Ираклий Кобакҳидзе Тбилиси шаҳрида ўзбек халқининг буюк шоири ва мутафаккири Алишер Навоий ҳайкалининг тантанали очилиш маросимида иштирок этдилар.

 

Маросимда Алишер Навоийнинг бой илмий ва адабий мероси нафақат ўзбек халқи, балки бутун инсониятнинг бебаҳо маънавий бойлиги экани алоҳида таъкидланди. Унинг асарлари асрлар давомида инсонпарварлик, маърифат, тафаккур ва эзгулик ғояларини тарғиб этиб, турли халқлар ва авлодлар учун илҳом манбаи бўлиб келаётгани қайд этилди.

 

Таъкидланганидек, Тбилисида Алишер Навоий ҳайкалининг очилиши Ўзбекистон ва Грузия ўртасидаги маданий-гуманитар ҳамкорлик тарихидаги муҳим воқеалардан бири бўлди. Икки халқни азалдан дўстлик, савдо алоқалари ва ўзаро ҳурмат ришталари боғлаб келгани, бугунги кунда эса ушбу муносабатлар янги мазмун билан бойиб бораётгани қайд этилди.

 

Шунингдек, Ўзбекистонда буюк грузин шоири Шота Руставели меросига юксак эҳтиром кўрсатилаётгани, Тошкентдаги марказий кўчалардан бири унинг номи билан аталиши ҳамда ҳайкали ўрнатилгани эслатиб ўтилди. Ўз навбатида, ўтган йили Тбилисидаги марказий боғлардан бирига Алишер Навоий номи берилгани икки халқ ўртасидаги дўстликнинг яна бир ёрқин ифодаси экани таъкидланди.

 

Сўнгги йилларда Ўзбекистон ва Грузия ўртасидаги маданий-гуманитар ҳамкорлик изчил ривожланиб, Тбилисида Ўзбекистон маданияти ва киноси кунлари, Тошкентда эса Грузия маданияти кунлари муваффақиятли ташкил этилди.

 

Маросим якунида Тбилисида қад ростлаган Алишер Навоий ҳайкали Ўзбекистон ва Грузия халқлари ўртасидаги мустаҳкамланиб бораётган дўстлик ва стратегик шериклик муносабатларининг ёрқин рамзига айланиши таъкидланди.