Грузияда Ўзбекистон элчихонаси очилади
Шавкат Мирзиёев ва Грузия Бош вазири Ираклий Кобахидзе тор доирада ва икки мамлакат расмий делегациялари иштирокида музокара ўтказдилар.
Грузияга давлат ташрифи доирасида Шавкат Мирзиёев Грузия Бош вазири Ираклий Кобахидзе билан тор доирада ҳамда расмий делегациялар иштирокида музокаралар ўтказди.
Учрашув аввалида давлат раҳбари Ўзбекистон Президентининг Грузияга йигирма йилдан ортиқ танаффусдан сўнг амалга ошираётган ушбу давлат ташрифи икки мамлакат ўртасидаги муносабатларни сифат жиҳатидан янги босқичга олиб чиқишда муҳим аҳамият касб этишини таъкидлади.
Музокаралар давомида сиёсий мулоқот, савдо-иқтисодий, инвестициявий, транспорт-транзит, туризм ҳамда маданий-гуманитар соҳалардаги ҳамкорликни янада кенгайтириш масалалари атрофлича муҳокама қилинди.
Томонлар барча даражалардаги мулоқотлар изчил ривожланаётганини мамнуният билан қайд этиб, ҳукуматлар, парламентлар, ишбилармон доиралар ва маданий-гуманитар алоқаларни янада фаоллаштириш муҳимлигини таъкидлади.
Қайд этилишича, 2025 йилда икки мамлакат ўртасидаги товар айирбошлаш ҳажми 270 миллион долларни ташкил этган бўлса, жорий йил бошидан буён бу кўрсаткич 100 миллион доллардан ошган. Томонлар яқин йилларда ўзаро савдо ҳажмини 1 миллиард долларга етказиш, экспорт-импортдаги номутаносибликни бартараф этиш ҳамда талаб юқори бўлган маҳсулотлар етказиб беришни кенгайтиришга қаратилган қўшма “йўл харитаси”ни ишлаб чиқишга келишиб олди.
Транспорт ва логистика йўналишидаги ҳамкорликни ривожлантириш масалаларига ҳам алоҳида эътибор қаратилди. Хусусан, Ўзбекистон юкларини ташишда Поти ва Батуми портлари инфратузилмасидан фаол фойдаланиш, Грузияда логистика хаби, саноат зонаси ҳамда Ўзбекистон маҳсулотлари учун шоурум ташкил этиш режалари қўллаб-қувватланди.
Шунингдек, “Боку – Тбилиси – Карс” темир йўлини барпо этилаётган “Хитой – Қирғизистон – Ўзбекистон” темир йўл магистрали билан боғлаш имкониятларини ўрганиш таклиф этилди.
Музокараларда саноат кооперациясини ривожлантириш устувор йўналиш сифатида белгиланди. Қишлоқ хўжалиги, электротехника, энергетика, фармацевтика, озиқ-овқат ва енгил саноат, қурилиш материаллари ишлаб чиқариш, рақамлаштириш, ахборот технологиялари, рақамли банк хизматлари ҳамда туризм йўналишларида янги қўшма лойиҳаларни амалга ошириш бўйича келишувларга эришилди.
Лойиҳаларни молиявий қўллаб-қувватлаш мақсадида Ўзбекистон–Грузия қўшма Инвестиция жамғармасини ташкил этиш таклиф қилинди.
Маданий-гуманитар алоқаларни ривожлантириш масалалари ҳам музокараларнинг муҳим йўналишларидан бири бўлди. Президентимиз Грузия томонига Тбилисидаги боғлардан бирига буюк мутафаккир Алишер Навоий номини бериш ҳақидаги қарор учун миннатдорлик билдирди. Шунингдек, жорий йилда Ўзбекистонда қўшма таълим ва туризм форумларини ўтказиш режалаштирилди.
Музокаралар якунида Ўзбекистоннинг Грузиядаги элчихонасини ташкил этиш тўғрисида қарор қабул қилинди ҳамда эришилган барча келишувларнинг амалий ижросини таъминлаш мақсадида қўшма “йўл харитаси” ишлаб чиқилиши белгиланди.
