Ўзбекистон ва Грузия муносабатлари стратегик шериклик даражасига кўтарилди
Икки мамлакат ўртасидаги ҳамкорликни янги босқичга олиб чиқадиган декларация ва ўндан ортиқ меморандум ҳамда битимлар имзоланди.
Грузиянинг Тбилиси шаҳрида бўлиб ўтган олий даражадаги музокаралар якунида Шавкат Мирзиёев ҳамда Грузия Бош вазири Ираклий Кобакҳидзе Стратегик шериклик муносабатларини ўрнатиш тўғрисидаги декларацияни имзоладилар.
Шунингдек, давлат раҳбарлари ҳузурида Ўзбекистон ва Грузия ўртасидаги ҳамкорликни кенгайтиришга қаратилган қатор икки томонлама ҳужжатлар алмашилди.
Имзоланган ҳужжатлар божхона соҳасида ҳамкорлик, ахборот-коммуникация технологиялари ва рақамлаштириш, касбий ва олий таълим, фан ва инновациялар, 2026–2027 йилларга мўлжалланган ҳукуматлараро ҳамкорлик дастури, 2027–2030 йилларга мўлжалланган маданий ҳамкорлик дастури, иқтисодиёт ва молия, қишлоқ хўжалиги, туризм, соғлиқни сақлаш, атроф-муҳитни муҳофаза қилиш, меҳнат миграцияси, радиациявий ҳимоя ва ядровий хавфсизлик каби йўналишларни қамраб олди.
Бундан ташқари, Ўзбекистон Бош прокуратураси ҳузуридаги Мажбурий ижро бюроси ҳамда Грузия Адлия вазирлиги ҳузуридаги Миллий ижро бюроси ўртасида ҳамкорлик тўғрисидаги меморандум ҳам имзоланди.
