Қашқадарёда 9 та автомобиль иштирокида ЙТҲ содир бўлди
Юк машинасининг тормоз тизимида юзага келган носозлик оқибатида у ўзи билан бир йўналишда ҳаракатланаётган жами 9 та транспорт воситаси билан тўқнашган.
Қашқадарё вилоятининг Шаҳрисабз туманида HOWO русумли юк автомобили иштирокида занжирли йўл-транспорт ҳодисаси содир бўлди.
Вилоят ИИБ Жамоат хавфсизлиги хизмати Йўл ҳаракати хавфсизлиги бошқармаси маълумотига кўра, ҳодиса 3 июль куни соат 14:30 атрофида Шаҳрисабз тумани ҳудудидан ўтувчи 70В010 автомобиль йўлининг 22-километрида юз берган.
Дастлабки маълумотларга кўра, HOWO русумли юк транспорт воситасининг тормоз тизимида юзага келган носозлик оқибатида у ўзи билан бир йўналишда ҳаракатланаётган жами 9 та транспорт воситаси — икки дона Lacetti, Tracker-2, Nexia-1, Nexia-3, Matiz, Damas вa Spark автомобиллари билан тўқнашган.
Тўқнашув зарбаси оқибатида Nexia-1 автомобили ҳайдовчиси йўл четида ҳаракатланаётган пиёдани туртиб юборган.
Жабрланган пиёдага воқеа жойида шифокорлар томонидан биринчи тиббий ёрдам кўрсатилган.
Мазкур ҳолат юзасидан Қашқадарё вилояти ИИБ ЖХХ Йўл ҳаракати хавфсизлиги бошқармаси масъул ходимлари томонидан суриштирув ишлари олиб борилмоқда.
