Россия Украинага ҳаво ҳужумлари уюштирди: қурбонлар бор
Ҳужумлар оқибатда кўп қаватли уй, дўкон ва йўл инфратузилмасига зарар етган.
Россия Қуролли кучлари Украинанинг Суми шаҳрига авиабомбалар ва дронлар ёрдамида ҳужум уюштирди. Ҳужум оқибатида камида 4 киши ҳалок бўлган, яна 27 киши, жумладан 7 нафар бола жароҳат олган.
Суми вилояти ҳарбий маъмурияти раҳбари Олег Григоровнинг маълум қилишича, зарбалардан бири шаҳарнинг Ковпаковский туманидаги турар жой ҳудудига келиб тушган. Оқибатда кўп қаватли уй, дўкон ва йўл инфратузилмасига зарар етган.
Расмийларга кўра, ҳалок бўлганлар орасида 5 ёшли қизалоқ ва унинг онаси ҳам бор. Шунингдек, оғир жароҳат олган фуқаролардан бири шифохонада вафот этган.
Шу билан бирга, Россия кучлари Запорижжя шаҳрига ҳам ракета ва дронлар билан зарба берган. Запорижжя вилояти ҳарбий маъмурияти раҳбари Иван Федоровнинг билдиришича, ҳужум оқибатида турар жой ва саноат объектлари зарар кўрган.
Дастлабки маълумотларга кўра, Запорижжядаги ҳужум натижасида 2 киши ҳалок бўлган, яна 21 киши турли даражадаги тан жароҳатлари олган.
