Венесуэладаги зилзила қурбонлари сони 2 645 кишига етди
Табиий офат оқибатида 15 мингдан ортиқ киши бошпанасиз қолган.
Венесуэлада 24 июнь куни содир бўлган кучли зилзилалар оқибатида ҳалок бўлганлар сони 2 645 нафарга етди. Бу ҳақда мамлакат Алоқа ва ахборотлаштириш вазирлиги маълум қилди.
Расмий маълумотларга кўра, табиий офат оқибатида 12 666 киши жароҳатланган, 15 050 киши бошпанасиз қолган. Шунингдек, 189 та бино бутунлай вайрон бўлган.
Қутқарув хизматлари томонидан олиб борилган амалиётлар давомида 6 462 киши вайроналар остидан тирик қутқарилган. Шу билан бирга, 20 909 нафар жабрланувчига тиббий ёрдам кўрсатилган, 86 117 та оилага гуманитар кўмак етказилган ҳамда табиий офатдан зарар кўрган ҳудудларга 9 486 тонна озиқ-овқат етказиб берилган.
Вазирлик маълумотига кўра, зилзилалардан сўнг мамлакат ҳудудида 890 та афтершок қайд этилган.
Эслатиб ўтамиз, 24 июнь куни Венесуэланинг Яракуй штатида қарийб 40 сония фарқ билан магнитудаси 7,2 ва 7,5 бўлган иккита кучли зилзила содир бўлган эди.
