Мужтабо Хоманаий отасининг дафн маросимида қатнашмади

Эронда марҳум олий раҳбар Али Хоманаийнинг дафн маросимлари давом этмоқда. Беш шаҳарда ўтказилаётган видолашув маросимлари 9 июлгача давом этиши режалаштирилган.

 

Бироқ ҳозирга қадар амалдаги олий раҳбар Мужтабо Хоманаий отаси билан видолашув маросимларида кўринмади, дея хабар бермоқда Nur.kz The New York Тimes'га таяниб.

 

Али Хоманаийнинг дафн маросимини ташкил этиш қўмитаси раҳбари Акбар Пуржамшидиён аввалроқ Мужтабо Хоманаийнинг маросимда иштирок этиши масаласи унинг ваколатига кирмаслигини билдирган.

 

The New York Times нашрининг Эрон Ислом инқилоби қўриқчилари корпусининг икки нафар аноним ходимига таяниб ёзишича, Мужтабо Хоманаийнинг хавфсизлик хизмати Исроил томонидан эҳтимолий суиқасд уюштирилиши ёки унинг ҳаракатланиш йўналиши орқали яширин жойи аниқланиши мумкинлиги ҳақидаги хавотирлар сабаб унинг маросимда қатнашишига рухсат бермаган.

 

Нашр маълумотига кўра, Мужтабо Хоманаий дафн маросимининг айрим қисмларида иштирок этишни истаган. Хусусан, у 9 июль куни Машҳад шаҳридаги Имом Ризо зиёратгоҳида бўлиб ўтадиган маросимда қатнашиб, отаси учун жаноза дуосини ўқишни режалаштирган.

 

Ҳозирча Эрон расмийлари Мужтабо Хоманаийнинг дафн маросимида қатнашмагани юзасидан расмий баёнот бергани йўқ.