Андижонда 5 нафар эгизак дунёга келди
Чақалоқларнинг уч нафари қиз, икки нафари эса ўғил бўлиб, она ва болаларнинг аҳволи яхши.
Андижонда 6 июль куни 5 нафар эгизак дунёга келди. Бу ҳақда Соғлиқни сақлаш вазирлиги хабар берди.
Маълум қилинишича, Андижон шаҳридаги "Қайрағочтош" маҳалла фуқаролар йиғинида яшовчи Наргиза Бекжонова 6 июль куни кўп ҳомилалик ташхиси билан Андижон шаҳар 2-сон туғуруқ мажмуасига ётқизилган.
Унда муддатидан олдинги туғруқ ташхиси билан кесарча кесиш амалиёти ўтказилган. Жараён акушер-гинекологлар, неонатологлар ва реаниматологлар иштирокида муваффақиятли амалга оширилган.
Маълум бўлишича:
- биринчи чақалоқ: қиз, вазни 1450 гр;
- иккинчи чақалоқ: ўғил, вазни 1605 гр;
- учинчи чақалоқ: қиз, вазни 1495 гр;
- тўртинчи чақалоқ: ўғил, вазни 1585 гр;
- бешинчи чақалоқ: қиз, вазни 1205 гр.
Шундан сўнг она ва чақалоқлар ихтисослаштирилган тиббий ёрдам кўрсатиш мақсадида Республика ихтисослаштирилган она ва бола саломатлиги илмий-амалий тиббиёт марказининг Андижон вилояти филиалига ўтказилди.
Соғлиқни сақлаш вазирлиги маълумотига кўра, айни пайтда она ва беш нафар чақалоқ шифокорлар назорати остида бўлиб, уларнинг аҳволи яхши.
Эслатиб, ўтамиз, май ойида ҳам Андижон вилоятида истиқомат қилувчи аёл бир йўла 4 нафар эгизак — уч нафари ўғил ва бир қизалоқни дунёга келтирганди.
