Andijonda 4 nafar egizak tug'ildi
Ko‘p homilali tug‘ruq natijasida uch o‘g‘il va bir qiz dunyoga keldi.
Andijon viloyatida istiqomat qiluvchi ayol bir yo‘la 4 nafar egizak — uch nafari o‘g‘il va bir qizaloq dunyoga keltirdi. Bu haqda Sog‘liqni saqlash vazirligi ma’lum qildi.
Qayd etilishicha, Respublika ixtisoslashtirilgan ona va bola salomatligi ilmiy-amaliy tibbiyot markazining Andijon viloyati filialida noyob tug‘ruq muvaffaqiyatli amalga oshirilgan.
Andijon shahridagi “G‘ayrat” mahalla fuqarolar yig‘inida yashovchi Odinaxon Muhammadjonova 2-iyun kuni ko‘p homilali homiladorlik tashxisi bilan mazkur tibbiyot muassasasiga yotqizilgan. Bir necha kunlik tibbiy kuzatuvdan so‘ng muddatidan oldin tug‘ruq tashxisi asosida kesarcha kesish amaliyoti o‘tkazilgan.
Tug‘ruq jarayoni malakali akusher-ginekologlar, neonatologlar va reanimatologlar ishtirokida muvaffaqiyatli yakunlangan. Natijada uch nafar o‘g‘il va bir nafar qizaloq dunyoga kelgan.
Chaqaloqlarning vazni mos ravishda 2415 gramm, 1730 gramm, 2405 gramm va 1885 grammni tashkil etgan.
Mutaxassislar ma’lumotiga ko‘ra, ayni paytda ona va chaqaloqlarning salomatlik holati qoniqarli bo‘lib, ular shifokorlar nazorati ostida parvarish qilinmoqda.
