Шавкат Мирзиёев Нурсултон Назарбоевни таваллуд куни билан табриклади
Давлат раҳбари Нурсултон Назарбоевнинг замонавий Қозоғистонни барпо этиш ва Ўзбекистон–Қозоғистон муносабатларини мустаҳкамлашдаги хизматларини алоҳида эътироф этди.
Шавкат Мирзиёев 6 июль куни телефон орқали мулоқотда Нурсултон Назарбоевни таваллуд куни билан самимий табриклаб, унга мустаҳкам соғлиқ, бахт-саодат ва узоқ умр тилади.
Давлат раҳбари Нурсултон Назарбоевнинг замонавий Қозоғистонни барпо этиш, Марказий Осиёда минтақавий ҳамкорликни ривожлантириш ҳамда Ўзбекистон ва Қозоғистон ўртасидаги стратегик шериклик ва иттифоқчилик муносабатларини мустаҳкамлашдаги улкан хизматларини алоҳида эътироф этди.
Телефон мулоқоти давомида Ўзбекистон ва Қозоғистон ўртасидаги дўстлик, яхши қўшничилик ва ўзаро ишончга асосланган кўп қиррали ҳамкорлик бугунги кунда изчил ривожланиб бораётгани мамнуният билан қайд этилди.
