Дамашқда Макрон жойлашган меҳмонхона яқинида портлашлар юз берди
Сурия Ички ишлар вазирлиги маълумотига кўра, ҳодиса оқибатида камида 18 киши жароҳат олган.
Сурия пойтахти Дамашқда Франция президенти Эммануэл Макрон ташрифи вақтида иккита портлаш содир бўлди. Бу ҳақда маҳаллий ва халқаро оммавий ахборот воситалари хабар берди.
Дастлабки маълумотларга кўра, портлашлардан бири Сурия Туризм вазирлиги биноси яқинида, иккинчиси эса Макрон жойлашган Фоур Сеасонс меҳмонхонаси атрофида юз берган.
Сурия Ички ишлар вазирлиги маълум қилишича, ҳодиса оқибатида камида 18 киши жароҳатланган, улар орасида тўрт нафар полиция ходими ҳам бор. Айрим оммавий ахборот воситалари қурбонлар борлигини ҳам хабар қилган, бироқ бу маълумот расмий идоралар томонидан тасдиқланмаган.
Дастлабки тергов маълумотларига кўра, портлашларга иккита қўлбола портловчи қурилма сабаб бўлган. Ҳуқуқни муҳофаза қилувчи органлар ҳодисага алоқадор шахсларни аниқлаш бўйича тергов ҳаракатларини бошлаган.
Сурия Ички ишлар вазирлиги портлашлар Макрон жойлашган меҳмонхона атрофида ташкил этилган хавфсизлик зонасидан ташқарида содир бўлганини ҳамда Франция президенти ҳаётига хавф туғдирмаганини маълум қилган.
Шунингдек, Франция томони Макроннинг ҳодисада жароҳат олмаганини тасдиқлаган. Хабарларга кўра, портлаш содир бўлган вақтда президент кортежи меҳмонхонани тахминан 15 дақиқа аввал тарк этган бўлган.
Маълум қилинишича, портлашлар Франция президенти Эммануэл Макроннинг Сурияга ташрифи дастурига таъсир кўрсатмаган. У режалаштирилганидек Сурия Президенти Аҳмад аш-Шараа билан музокараларни ўтказган.
