Биз бугун кечқурун Эронга қаттиқ зарба берамиз — Трамп

АҚШ президенти Доналд Трамп АҚШ 8 июль  оқшомида Эронга яна зарба бериши мумкинлигини маълум қилди. Шу билан бирга, у АҚШ ва Эрон ўртасида тузилган дастлабки сулҳ келишуви амалда якунланганини билдирди. Бу ҳақда Reuters хабар берди.

 

Қайд этилишича, Анқарада бўлиб ўтаётган НАТО саммити доирасида журналистлар билан мулоқот қилган Трамп Эронни музокаралар давомида эришилган келишувларга риоя қилмаётганликда айблади. Унинг айтишича, АҚШ ҳарбийлари аввалги куни Эрон ҳудудларига зарба берган ва зарурат туғилса, янги ҳужумлар ҳам амалга оширилиши мумкин.

 

"Уларга кичик бир огоҳлантириш бераман: бугун кечқурун қаттиқ зарба берамиз", — деди Трамп Украина президенти Володимир Зеленский билан учрашуви олдидан.

 

Трамп аввалроқ АҚШ ва Эрон ўртасидаги дастлабки сулҳ учун асос бўлиб хизмат қилган англашув меморандуми ўз кучини йўқотганини ҳам маълум қилган. Унинг ушбу баёнотлари ортидан жаҳон бозорида нефть нархлари кескин ошди.

 

Шу билан бирга, АҚШ президенти Вашингтон Эрон билан яна тўлиқ миқёсдаги уруш бошлаш ниятида эканини тасдиқламади. Шунингдек, дастлабки сулҳни доимий келишувга айлантириш бўйича музокаралар давом этадими ёки йўқми, бу борада ҳам аниқ изоҳ бермади.

 

Трамп Эрон ҳеч қачон ядро қуролига эга бўлмаслиги кераклигини яна бир бор таъкидлаб, бунга келишувсиз ҳам эришиш мумкинлигини айтди.

 

Сўнгги кескинлашув фонида Эрон АҚШнинг Эрон ҳудудларига берган зарбаларига жавобан Баҳрайн ва Қувайтдаги АҚШ ҳарбий объектларини нишонга олганини маълум қилди. АҚШ эса бу зарбаларни Ҳормуз бўғозида танкерлар ҳужумга учраганидан кейин амалга оширганини билдирган.

 

Можаронинг қайта авж олиши Ҳормуз бўғозидаги хавфсизлик билан боғлиқ хавотирларни кучайтирди. Кема қатнови маълумотларига кўра, камида тўртта нефть ва газ танкери ушбу стратегик сув йўлаги орқали ҳаракатланишдан воз кечиб, ортга қайтган.