Эрон АҚШни ўзаро англашув меморандумини бузганликда айблади
АҚШнинг сўнгги ҳарбий амалиётлари ҳарбий ҳаракатларни тўхтатиш бўйича эришилган келишувга зид ҳисобланади.
Эрон Ташқи ишлар вазирлиги АҚШни Эрон ҳудудига уюштирилган навбатдаги ҳарбий ҳужумлар орқали урушни тугатиш бўйича тузилган битимни бузганликда айблади.
Вазирлик баёнотида қайд этилишича, АҚШ ҳарбийлари Эрон жанубидаги бир нечта кузатув марказларига зарба берган. Теҳрон бу ҳаракатни БМТ Низомининг 2-моддаси 4-бандига ҳамда ҳарбий ҳаракатларни тўхтатишни назарда тутувчи битимнинг биринчи бандига зид деб баҳолаган.
Эрон ТИВ, шунингдек, АҚШ томонидан Эрон нефтини экспорт қилишга оид рухсатларнинг бекор қилиниши, Ҳормуз бўғозидаги манфаатларга путур етказилиши ва Исроилнинг Ливандаги ҳарбий амалиётлари урушни тугатиш бўйича эришилган келишувнинг асосий шартларини издан чиқарганини таъкидлаган.
Расмий Теҳрон минтақадаги вазиятнинг кескинлашуви оқибатлари учун АҚШни жавобгар деб ҳисоблашини маълум қилган.
Баёнотда Форс кўрфази давлатлари ва бошқа мамлакатлар халқаро ҳуқуқ нормаларига риоя қилиши, уларнинг ҳудуди ва инфратузилмасидан Эронга қарши ҳарбий ҳаракатлар учун фойдаланилишига йўл қўймаслиги лозимлиги қайд этилган.
Эрон Ташқи ишлар вазирлиги АҚШнинг ҳарбий ҳаракатларини кескин қоралаб, БМТ Хавфсизлик Кенгаши ҳамда БМТ Бош котибини минтақавий ва халқаро хавфсизликни таъминлаш бўйича ўз масъулиятини бажаришга чақирди.
Шунингдек, баёнотда Эрон Қуролли кучлари БМТ Низомининг 51-моддасига мувофиқ мамлакатнинг ҳудудий яхлитлиги, суверенитети ва миллий хавфсизлигини ҳимоя қилиш учун зарур чораларни кўриши таъкидланган.
