Минскда Ўзбекистон Президенти расмий кутиб олинди
Маросимдан сўнг олий даражадаги музокаралар бошланди.
Беларус пойтахти Минск шаҳридаги Мустақиллик саройида расмий ташриф билан ушбу мамлакатда бўлиб турган Ўзбекистон Президенти Шавкат Мирзиёевни тантанали кутиб олиш маросими бўлиб ўтди.
Маросим давомида сарой олдидаги майдонда Ўзбекистон ва Беларус давлат байроқлари кўтарилди ҳамда фахрий қоровул саф тортди. Шавкат Мирзиёевни Беларус Президенти Александр Лукашенко самимий кутиб олди.
Шундан сўнг икки давлатнинг давлат мадҳиялари янгради. Давлат раҳбарлари фахрий қоровул сафи олдидан ўтиб, расмий делегациялар аъзоларини қутладилар.
Маросим якунида президентлар биргаликда суратга тушди. Шундан сўнг Ўзбекистон ва Беларус етакчиларининг олий даражадаги икки томонлама музокаралари бошланди.
