Шавкат Мирзиёев Беларус Президентини Ўзбекистонга таклиф этди

 

Минск шаҳрида Шавкат Мирзиёев ва Беларус Президенти Александр Лукашенко тор доирада ҳамда расмий делегациялар иштирокида музокаралар ўтказди.

 

Учрашув аввалида давлат раҳбари сўнгги йилларда Ўзбекистон ва Беларус ўртасидаги кўп қиррали ҳамкорлик сифат жиҳатидан янги босқичга кўтарилганини алоҳида таъкидлади.

 

Қайд этилишича, расмий ташриф арафасида Ҳукуматлараро комиссия ва Ишбилармонлар кенгаши йиғилишлари, сиёсий маслаҳатлашувлар, экспертлар учрашувлари ҳамда Ўзбекистон маданияти кунлари муваффақиятли ташкил этилди.

 

Музокараларда икки мамлакат ўртасидаги савдо-иқтисодий алоқалар изчил ривожланаётгани қайд этилди. Сўнгги беш йил давомида ўзаро савдо ҳажми қарийб уч баробар ошиб, 2025 йил якунларига кўра қарийб 1 миллиард долларга етган. Жорий йилнинг ўтган даврида эса бу кўрсаткич яна 30 фоизга ўсган. Айни пайтда икки давлат иштирокидаги 360 та қўшма корхона фаолият юритмоқда.

 

Томонлар ўзаро савдо ҳажмини 2 миллиард долларга етказиш бўйича келишувларни олқишлаб, қишлоқ хўжалиги, машинасозлик, фармацевтика, электротехника, енгил саноат, мебелсозлик ва бошқа тармоқларда янги кооперация лойиҳаларини амалга оширишга келишиб олди.

 

Шунингдек, Ўзбекистоннинг тинч атом энергетикасидан фойдаланиш ва ушбу йўналишда инфратузилмани ривожлантириш борасида Беларус тажрибасини ўрганишга қизиқиш билдирилди.

 

Музокараларда Минск шаҳрида ўтказилган учинчи Ўзбекистон–Беларус ҳудудлараро форуми якунлари ҳам юқори баҳоланиб, унинг доирасида савдо шартномалари ва инвестиция битимларининг салмоқли пакети имзолангани қайд этилди.

 

Президентлар БМТ, МДҲ, Шанхай ҳамкорлик ташкилоти ва Қўшилмаслик ҳаракати каби халқаро тузилмалар доирасидаги ўзаро ҳамкорликни давом эттиришга қатъий интилишларини тасдиқлади.

 

Маданий-гуманитар алоқаларни янада ривожлантириш масалалари ҳам муҳокама қилиниб, жорий йил якунига қадар қўшма туризм, тиббиёт ва таълим форумларини ўтказишга келишиб олинди.

 

Учрашув якунида Президент Шавкат Мирзиёев Беларус Президенти Александр Лукашенкони расмий ташриф билан Ўзбекистонга келишга таклиф этди.