ICESCO бош директори Салим ал-Малик “Дўстлик” ордени билан тақдирланди
Жорий йилда Тошкентда ICESCO офиси очилди, Ўзбекистоннинг 7 та мерос объекти ташкилот рўйхатига киритилди.
Шавкат Мирзиёев Ислом цивилизацияси I халқаро форуми доирасида мамлакатимизга ташриф буюрган Ислом дунёси таълим, фан ва маданият ташкилоти (ICESCO) бош директори Салим ал-Маликни қабул қилди.
Учрашувда Ўзбекистон ва ICESCO ўртасидаги кўп қиррали шерикликни янада ривожлантириш ҳамда ҳамкорликнинг истиқболли йўналишлари муҳокама қилинди.
Мулоқот давомида халқаро ташкилот билан амалий ҳамкорлик изчил кенгайиб бораётгани алоҳида қайд этилди. Хусусан, Ўзбекистон халқаро исломшунослик академиясида ICESCO кафедраси фаолият юритмоқда, жорий йилда Тошкент шаҳрида ташкилотнинг минтақавий офиси иш бошлади.
Шунингдек, жорий йил февраль ойида Ислом олами маданий мероси қўмитасининг йиғилиши якунларига кўра, Ўзбекистоннинг 7 та моддий ва номоддий маданий мерос объекти ICESCO рўйхатига киритилгани мамнуният билан қайд этилди.
Томонлар маданий ёдгорликлар ва ноёб қўлёзмаларни реставрация қилиш, муҳофаза этиш ва рақамлаштириш, мамлакатимизнинг бой тарихий-маданий меросини халқаро медиа платформалари орқали кенг тарғиб қилиш ҳамда қўшма илмий ва маданий тадбирларни ташкил этиш масалаларига алоҳида эътибор қаратдилар.
Учрашув якунида Шавкат Мирзиёев халқимизнинг бой маданий меросини халқаро миқёсда кенг тарғиб этишга қўшган муносиб ҳиссаси учун ICESCO бош директори Салим ал-Маликни Ўзбекистон Республикасининг «Дўстлик» ордени билан тақдирлади.
