Шайхулислом Оллоҳшукур Пошшозода “Эл-юрт ҳурмати” ордени билан тақдирланди
Шавкат Мирзиёев Кавказ мусулмонлари идораси раисини қабул қилиб, унга давлат мукофотини топширди.
Шавкат Мирзиёев Ислом цивилизацияси I Халқаро форумида иштирок этиш учун мамлакатимизга ташриф буюрган Кавказ мусулмонлари идораси раиси, шайхулислом Оллоҳшукур Пошшозодани қабул қилди.
Учрашув аввалида давлат раҳбари шайхулислом томонидан туҳфа этилган, Ўзбекистон ва Озарбайжон раҳбарларининг икки томонлама ҳамкорлигини ёритувчи “Қардошлик ва иттифоқчиликнинг олий нуқтаси” китоби учун миннатдорлик билдирди.
Мулоқот чоғида миллатлараро тотувлик ва диний бағрикенгликни мустаҳкамлаш, ёшларнинг маънавий тарбиясини юксалтириш ҳамда диний-маърифий ҳамкорликни кенгайтириш масалалари муҳокама қилинди.
Томонлар ислом динининг асл инсонпарварлик моҳиятини ёш авлодга замонавий усуллар орқали етказиш муҳимлигини қайд этдилар. Шу мақсадда рақамли платформалар, интерактив таълим воситалари ва илмий салоҳиятни бирлаштириш бўйича ҳамкорликни кучайтириш таклиф этилди.
Учрашув якунида Шавкат Мирзиёев шайхулислом Оллоҳшукур Пошшозодани мусулмон дунёсида илм-фан, маърифат ва динлараро тотувликни ривожлантиришга қўшган улкан ҳиссаси учун Ўзбекистон Республикасининг “Эл-юрт ҳурмати” ордени билан тақдирлади.
