Ўзбекистондаги 200 дан ортиқ сув объектининг номи ўзбекчалаштирилади
Ушбу ўзгаришлар асосида хариталар, давлат реестрлари ҳамда объектлардаги пешлавҳа ва ахборот кўрсаткичлари ҳам янгиланади.
Ўзбекистонда 216 та дарё, сой, кўл, булоқ ва шаршаранинг номи давлат тили қоидаларига мослаштирилди. Бу ҳақда Сув хўжалиги вазирлиги хабар берди.
Вазирлар Маҳкамасининг 2026 йил 9 июлдаги 377-сон қарорига кўра, айрим географик объектларнинг номлари ўзбек тилининг имло меъёрларига мувофиқ расмийлаштирилди. Масалан, "Аккол" номи "Оққўл", "Рибатский залив" "Балиқчикўл", "Тубакол" эса "Тубакўл" деб ўзгартирилди.
Эндиликда Сув хўжалиги вазирлиги икки ой ичида Кадастр агентлиги, Туризм қўмитаси ва "Ўзбекбалиқсаноат" уюшмаси билан биргаликда хариталар, давлат реестрлари ва бошқа маълумотлар базаларидаги номларни янгилайди.
Шунингдек, вазирлик Қорақалпоғистон Республикаси Вазирлар Кенгаши, вилоятлар ҳокимликлари, Туризм қўмитаси ва “Ўзбекбалиқсаноат” уюшмаси билан биргаликда дарё, сой, кўл, булоқ ва шаршаралар ҳудудларидаги пешлавҳалар ҳамда ахборот кўрсаткичларидаги ёзувларни давлат тили қоидалари ва меъёрларига мувофиқ лотин ёзувига асосланган ўзбек алифбосида расмийлаштиришни таъминлайди.
