Тошкентда офисдан 880 млн сўм ўғирлаган шахс қўлга олинди
Ўғирланган пуллар унинг яшаш хонадонидан топилган.
Тошкент шаҳрининг Юнусобод туманида жойлашган офислардан биридан 880 миллион сўм ўғирлаганликда гумон қилинган шахс қўлга олинди. Бу ҳақда Тошкент шаҳар Ички ишлар бош бошқармаси маълум қилди.
Маълумотларга кўра, Юнусобод туманидаги Марказ-5 даҳасида яшовчи фуқаро ички ишлар органларига мурожаат қилиб, офисдаги пуллари ўғирланганини билдирган. Олиб борилган тезкор-қидирув тадбирлари натижасида жиноятни содир этганликда гумон қилинган шахс аниқланиб, қўлга олинган.
Гумонланувчининг яшаш хонадони кўздан кечирилганда ўғирланган пуллар топилиб, ашёвий далил сифатида расмийлаштириб олинган. Тошкент шаҳар ИИББ томонидан эълон қилинган видеода гумонланувчи қилган ишидан пушаймон эканини билдирган.
Мазкур ҳолат юзасидан Жиноят кодексининг 169-моддаси (ўғрилик) билан жиноят иши қўзғатилган. Гумонланувчига нисбатан қамоққа олиш эҳтиёт чораси қўлланилган.
