Икки кичик сайёрага ўзбекистонлик олимлар номи берилди
Халқаро астрономик каталогларда эндиликда (131358) Камолергашев ва (121339) Отабекбуркҳонов номли астероидлар расман қайд этилди.
Халқаро астрономия жамиятининг Кичик жисмлар бўйича қўмитаси 2026 йил 9 июль куни эълон қилган расмий баёнотга кўра, Ўзбекистон Фанлар академияси Астрономия институтининг икки нафар олими — Камолиддин Эргашев ва Отабек Бурхонов номи икки кичик сайёрага (астероидга) берилди.
Мазкур номлар WGSBN Bulletin'нинг 6-жилд, 11-сонида эълон қилинган. Эндиликда халқаро астрономик каталогларда ушбу осмон жисмлари (131358) Камолергашев ва (121339) Отабекбуркҳонов номлари билан қайд этилади.
2001 йил 19 май куни Чехиянинг Ондрежов обсерваториясида кашф этилган ва аввал 2001 КА2 белгиси билан рўйхатга олинган астероид Астрономия институти катта илмий ходими Камолиддин Эргашев шарафига номланган. Расмий изоҳда унинг астероидлар фотометрияси, равшанлик эгри чизиқларини таҳлил қилиш, астероидларнинг физик хусусиятлари, шунингдек астероид жуфтликлари, кластерлари ва қўшалоқ астероид тизимларини тадқиқ этишдаги илмий ишлари алоҳида эътироф этилган.
Шунингдек, 1999 йил 13 октябрда чехиялик астрономлар томонидан кашф этилган ва дастлаб 1999 ТО15 белгиси билан рўйхатга олинган астероид Астрономия институти лаборатория мудири Отабек Бурхонов номи билан аталган. Расмий маълумотда олимнинг оптик фотометрия, астероидлар, ўзгарувчан юлдузлар, гравитацион линзаланган квазарлар ҳамда Майданак обсерваториясида гамма-чақнашларнинг кейинги оптик кузатувлари бўйича олиб борган тадқиқотлари юқори баҳолангани қайд этилган.
Мазкур қарор ўзбекистонлик олимларнинг астрономия соҳасидаги илмий изланишлари халқаро миқёсда эътироф этилганининг яна бир ёрқин ифодаси бўлди.
