Шавкат Мирзиёев Тоскана губернатори бошчилигидаги делегацияни қабул қилди
Томонлар Тоскана ва Ўзбекистон ҳудудлари ўртасидаги ҳамкорликни ривожлантиришга қаратилган қўшма “йўл харитаси”ни ишлаб чиқишга келишиб олди.
Президент Шавкат Мирзиёев 14 июль куни Ўзбекистонга амалий ташриф билан келган Италиянинг Тоскана вилояти губернатори Эуженио Жани бошчилигидаги делегацияни қабул қилди.
Учрашувда Ўзбекистон–Италия стратегик шериклигини, айниқса савдо-иқтисодий, инвестициявий ҳамда маданий-гуманитар йўналишларда ривожлантириш масалалари муҳокама қилинди. Томонлар ҳудудлараро ҳамкорликни кенгайтиришга алоҳида эътибор қаратди.
Қайд этилишича, жорий йил бошидан буён икки давлат ўртасидаги ўзаро савдо ҳажми 25 фоизга ошган. Ўзбекистонда металлургия, энергетика, қишлоқ хўжалиги, кимё саноати ва бошқа тармоқларда Италиянинг етакчи компаниялари иштирокидаги лойиҳалар амалга оширилмоқда.
Учрашувда Ўзбекистон ва Тоскана ўртасидаги тарихий ва маданий алоқалар, Буюк ипак йўли давридан бошланган ҳамкорлик анъаналари ҳам алоҳида таъкидланди.
Президент Тоскана билан тўқимачилик, чарм-пойабзал, озиқ-овқат, заргарлик саноати, қурилиш, таълим, маданият ва туризм соҳаларидаги ҳамкорликни ривожлантириш катта салоҳиятга эга эканини қайд этди.
Шунингдек, Тоскана ва Бухоро вилояти ўртасида йўлга қўйилган шериклик алоқалари юксак баҳоланди.
Учрашув якунида Тоскана ва Ўзбекистон ҳудудлари ўртасидаги ҳамкорликни янада кенгайтиришга қаратилган қўшма “йўл харитаси”ни ишлаб чиқиш ва қабул қилиш бўйича келишувга эришилди.
