Ўзбекистонда жамғариб бориладиган пенсия тизими ўзгаради
Пенсия ҳисоблашда инобатга олинадиган иш ҳақи даври амалдаги 5 йилдан 20 йилгача узайтирилади.
Президент Шавкат Мирзиёев пенсия тизимини ислоҳ қилиш бўйича ишлаб чиқилган таклифлар тақдимоти билан танишди. Таклифлар жамғариб бориладиган пенсия тизимини такомиллаштириш, фуқароларнинг пенсия жамғармаларини кўпайтириш ҳамда пенсия ҳисоблаш тартибини ўзгартиришни назарда тутади.
Унга кўра, ойлик иш ҳақи 7,6 миллион сўмгача (пенсия ҳисоблаш базавий миқдорининг 15 бараваригача) бўлган фуқаролар иш ҳақининг 5 фоизини жамғариб бориладиган пенсия ҳисобварағига йўналтирса, давлат томонидан қўшимча равишда яна 2,5 фоиз миқдорида маблағ ажратиш таклиф этилган.
Шунингдек, ойлик даромади 7,6 миллион сўмдан юқори бўлган фуқаролар учун ушбу чегарадан ортиқ қисм бўйича тўланган ижтимоий солиқнинг 1 фоизини уларнинг жамғариб бориладиган пенсия ҳисобварақларига ўтказиш режалаштирилмоқда.
Таклифлар орасида пенсия ҳисоблашда инобатга олинадиган иш ҳақи даврини амалдаги 5 йилдан 20 йилгача узайтириш ҳамда кам даромад олинган айрим даврларни ҳисоб-китобдан чиқариш ҳам бор.
Бундан ташқари, 2027 йилдан бошлаб пенсия ҳисоблашда инобатга олинадиган иш ҳақининг энг юқори чегарасини ҳозирги 6 миллион сўмдан 6,6 миллион сўмга ошириш таклиф қилинмоқда.
Президент мазкур ўзгаришлар миллионлаб фуқароларнинг ҳаёти ва келажагига дахлдор эканини таъкидлаб, ҳар бир таклифнинг ижтимоий ва иқтисодий таъсирини пухта ҳисоблаш, шунингдек, масалани аҳоли, кенг жамоатчилик, оммавий ахборот воситалари ҳамда блогерлар иштирокида очиқ муҳокама қилиш зарурлигини қайд этди.
