Ўзбекистон ва Туркманистон ТИВлари ўртасида ҳамкорлик дастури имзоланди

2026 йил 14 июль куни Ўзбекистон ташқи ишлар вазири Бахтиёр Саидов бошчилигидаги делегация Туркманистоннинг Ашхобод шаҳрига расмий ташриф билан борди.

 

 

Ташриф доирасида делегацияни Туркманистон Президенти Сердар Бердимуҳамедов қабул қилди. Учрашувда Президент Шавкат Мирзиёевнинг самимий саломи ва эзгу тилаклари етказилди.

 

 

Мулоқот чоғида Ўзбекистон ва Туркманистон ўртасидаги стратегик шериклик изчил ривожланаётгани, сиёсий мулоқот фаоллашгани ҳамда ўзаро савдо ҳажми барқарор ўсаётгани қайд этилди. Томонлар  асрлик дўстлик ва яхши қўшничилик муносабатларини янада мустаҳкамлашга тайёр эканини тасдиқлади.

 

Шунингдек, Бахтиёр Саидов Туркманистон Вазирлар Маҳкамаси Раиси ўринбосари, ташқи ишлар вазири Рашид Мередов билан тор доирада музокаралар ўтказди. Унда олий даражада эришилган келишувларни амалга ошириш, сиёсий мулоқотни давом эттириш, савдо-иқтисодий, транспорт-логистика, энергетика, маданий-гуманитар ва чегараолди ҳамкорлигини кенгайтириш масалалари муҳокама қилинди.

 

 

Музокаралар якунида халқаро ахборот хавфсизлигини таъминлаш соҳасида ҳамкорлик тўғрисидаги ҳукуматлараро битим ҳамда Ўзбекистон ва Туркманистон Ташқи ишлар вазирликлари ўртасида 2027–2028 йилларга мўлжалланган ҳамкорлик дастури имзоланди.

 

Ташриф доирасида икки давлат ташқи ишлар вазирликлари ўртасидаги сиёсий маслаҳатлашувларнинг навбатдаги давраси ҳам бўлиб ўтди. Унда давлат раҳбарлари топшириқлари ижроси, икки томонлама ҳамкорликнинг устувор йўналишлари, шунингдек, минтақавий ва халқаро кун тартибидаги масалалар юзасидан фикр алмашилди. 

 

Томонлар сиёсий маслаҳатлашувлар механизми ташқи сиёсат идоралари ўртасидаги мунтазам мулоқотни янада мустаҳкамлашга хизмат қилишини таъкидлади.