"Саломатлигингиз ва табиатни асранг": Экология қўмитаси муҳим огоҳлантириш билан чиқди
Ҳаво ҳарорати айрим ҳудудларда 48 даражагача кўтарилиши кутилаётгани сабабли қўмита фуқароларни ўз саломатлиги, дарахтлар ва ҳайвонот дунёсини асрашга чақирди.
Гидрометеорология хизмати агентлиги маълумотларига кўра, 18–20 июль кунлари Ўзбекистон ҳудудига жанубдан ўта иссиқ ҳаво массаларининг кириб келиши давом этади. Республика бўйича ҳаво ҳарорати 43–°C гача, жанубий ва чўл ҳудудларининг айрим жойларида эса 46–°C гача кўтарилиши кутилмоқда. Шамол тезлиги 13–18 м/с гача, айрим жойларда 20–22 м/с гача кучаяди. Баъзи ҳудудларда чанг ва қум бўронлари кузатилиши мумкин.
Экология ва иқлим ўзгариши миллий қўмитаси фуқароларга куннинг энг иссиқ вақтларида очиқ қуёш остида узоқ қолмаслик, кўпроқ суюқлик истеъмол қилиш ҳамда зарур эҳтиёт чораларига амал қилишни тавсия этди.
Қайд этилишича, юқори ҳарорат атроф-муҳитга ҳам салбий таъсир кўрсатиши мумкин. Хусусан, дарахт ва буталарнинг қуриши, ёш кўчатларнинг нобуд бўлиши ҳамда ҳайвонот дунёсига зарар етиши хавфи ортади.
Шу муносабат билан қўмита мутасадди ташкилотларни, айниқса, “Яшил макон” умуммиллий лойиҳаси доирасида экилган ёш кўчатларни ўз вақтида суғориш ва қўшимча парваришлашга алоҳида эътибор қаратишга чақирди.
Маҳаллий ҳокимликлар, коммунал хизматлар ва бошқа масъул ташкилотларга яшил ҳудудларни суғоришни кучайтириш, жамоат жойларини совитиш, суғориш тизимларининг узлуксиз ишлашини таъминлаш ҳамда табиий ёнғинларнинг олдини олиш бўйича қўшимча чоралар кўриш тавсия этилди.
“Бугун сақлаб қолинган ҳар бир дарахт, суғорилган ҳар бир кўчат ва ўз вақтида кўрилган ҳар бир чора мамлакатимизнинг экологик хавфсизлиги ҳамда барқарор келажагига қўшилган муносиб ҳиссадир”, дейилади хабарда.
