Тошкент аэропортида икки аёл одам савдоси қурбони бўлишдан сақлаб қолинди
Улар Туркияда юқори даромадли иш топиш ваъдасига алданиб, Истанбулга йўл олганди.
Фарғона вилояти Ички ишлар бошқармаси ҳамда Давлат хавфсизлик хизмати ходимлари ҳамкорлигида одам савдоси билан боғлиқ жиноятнинг олди олинди.
Аниқланишича, Наманган вилоятининг Поп туманида рўйхатда турган, аммо Фарғона вилоятининг Бувайда туманида яшаб келган аёл Туркиянинг Истанбул шаҳрида истиқомат қилувчи таниши билан олдиндан тил бириктириб, икки нафар аёлни чет элга юборишга уринган.
Маълум қилинишича, жабрланувчилардан бири Учкўприк, иккинчиси эса Бувайда туманида яшайди. Гумонланувчилар уларни Туркияда юқори даромадли иш топиш ваъдаси билан алдаб, Истанбулга бориш учун электрон авиачипталарни ҳам расмийлаштириб берган.
Бироқ ҳуқуқни муҳофаза қилувчи органлар томонидан ўтказилган тезкор тадбир давомида аёлларнинг хорижга чиқиб кетишига Тошкент халқаро аэропортида чек қўйилди.
Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Ҳуқуқни муҳофаза қилувчи органлар фуқароларни хорижда иш таклиф қилаётган шахсларга ишонишда эҳтиёт бўлиш, фақат қонуний меҳнат миграцияси йўлларидан фойдаланиш ва шубҳали таклифларга алданмасликка чақирди.
