Хоразмда Россияда олиб келинган қарийб 1,3 кг гашиш мусодара қилинди
Шунингдек, Юқоричирчиқ туманида наркокурерлар хуфия жойга қолдириб кетган 700 грамм гашишни олаётган фуқаро қўлга олинди.
Давлат хавфсизлик хизмати, Ички ишлар вазирлиги ҳамда Божхона органлари ходимлари ҳамкорлигида ўтказилган “Хавфсиз ва соғлом юрт” тезкор-профилактик тадбирлари доирасида хориждан олиб келинган гиёҳвандлик воситаларининг ноқонуний айланмасига чек қўйилди. Бу ҳақда ДХХ хабар берди.
Маълум қилинишича, Хоразм вилоятида ўтказилган тезкор тадбирда Урганч шаҳрида яшовчи, 1997 йилда туғилган, аввал гиёҳвандлик воситалари билан боғлиқ жинояти учун судланган фуқаро Урганч халқаро аэропортида Россия Федерациясидан юборилган жўнатмани қабул қилиб олаётган вақтда қўлга олинган.
Текширув давомида жўнатма ичидаги турли ширинликлар орасига шоколад кўринишида яширилган 538 грамм «гашиш» моддаси аниқланган.
Яна бир ҳолатда, Тошкент вилоятининг Юқоричирчиқ туманида пойтахтлик 45 ёшли фуқаро наркокурерлар томонидан мамлакатга контрабанда йўли билан олиб кирилиб, олдиндан хуфия жойга яшириб кетилган 700 грамм «гашиш» моддасини қабул қилиб олаётган вақтида ушланган.
Ҳозирда ҳар иккала ҳолат юзасидан жиноят ишлари қўзғатилиб, тергов ҳаракатлари олиб борилмоқда. Шунингдек, мазкур жиноятларга алоқадор бошқа шахсларни аниқлаш бўйича тезкор-суриштирув тадбирлари давом эттирилмоқда.
