Россияда оғир аҳволга тушган ўзбекистонлик аёл уч фарзанди билан ватанга қайтарилди
Аёл 15 йилдан ортиқ вақт давомида Россияда қонуний мақомсиз яшаб келган.
Ўзбекистоннинг Россиядаги элчихонаси кўмагида оғир ҳаётий вазиятга тушиб қолган Ўзбекистон фуқароси А.С. уч нафар вояга етмаган фарзанди билан ватанга қайтарилди. Бу ҳақда “Дунё” ахборот агентлиги хабар берди.
Маълум қилинишича, аёл элчихонанинг консуллик бўлимига мурожаат қилиб, 15 йилдан ортиқ вақт давомида Россияда қонуний мақомсиз яшаб келгани, шахсини тасдиқловчи ҳужжатлар ва молиявий имкониятлари йўқлиги сабабли фарзандлари учун муносиб шароит ярата олмаётганини маълум қилган ҳамда Ўзбекистонга қайтишда ёрдам сўраган.
Консуллик бўлими ходимлари Россиянинг тегишли давлат идоралари билан ҳамкорликда аёлнинг уч нафар фарзандига туғилганлик ҳақидаги гувоҳномаларни расмийлаштирган. Шунингдек, уларга консуллик йиғимлари ундирилмаган ҳолда Ўзбекистонга қайтиш гувоҳномалари берилган.
Бундан ташқари, Ўзбекистон Миграция агентлигининг Россиядаги ваколатхонаси кўмагида аёл ва унинг фарзандлари учун Uzbekistan Airways авиакомпаниясининг Москва–Урганч йўналиши бўйича авиачипталар харид қилиниб, уларнинг Ўзбекистонга хавфсиз қайтиши таъминланган.
