Ҳокимликларга аномал иссиқда ободонлаштириш ходимлари хавфсизлигини таъминлаш бўйича кўрсатма юборилди

Давлат меҳнат инспекцияси аномал иссиқ об-ҳаво шароитида очиқ ҳавода меҳнат қилаётган ободонлаштириш ходимларининг ҳаёти ва соғлиғини муҳофаза қилиш мақсадида барча ҳокимликларга махсус кўрсатма юборди.

 

Кўрсатмага мувофиқ, ҳаво ҳарорати юқори бўлган соат 10:00 дан 17:00 гача ходимларнинг ҳаёти ва соғлиғига хавф туғдириши мумкин бўлган очиқ ҳаводаги ишлар вақтинча тўхтатилиши ҳамда мослашувчан иш режими жорий этилиши лозим.

 

Шунингдек, иш берувчиларга ходимларни етарли миқдорда сифатли ичимлик суви билан таъминлаш, қуёш нурлари ва юқори ҳароратдан ҳимояланган дам олиш жойларини ташкил этиш, уларни шахсий ҳимоя воситалари билан таъминлаш ҳамда меҳнат ва дам олиш режимини қайта кўриб чиқиш топширилди.

 

Бундан ташқари, мажбурий тиббий кўрикдан ўтмаган ёки тиббий хулосага кўра ишга яроқсиз деб топилган шахсларни ишга жалб этмаслик, юқори ҳарорат таъсирида саломатлиги ёмонлашган ходимларга эса зудлик билан биринчи тиббий ёрдам кўрсатиш талаб этилади.

 

Давлат меҳнат инспекцияси мазкур кўрсатмалар ижроси назоратга олинганини маълум қилди. Қайд этилишича, меҳнатни муҳофаза қилиш талабларини бузган шахслар амалдаги қонунчиликка мувофиқ жавобгарликка тортилади.