Туркияда ўзбекистонлик аёл учинчи қаватдан тушиб кетди
Бурса шаҳридаги ўзбекистонлик кўнгиллилар аёлнинг даволаниши ва соғайишига кўмаклашди. Шундан сўнг у Ўзбекистонга қайтарилди.
Туркиянинг Бурса шаҳрида бахтсиз ҳодисага учраган Ўзбекистон фуқароси З.Н. Ўзбекистоннинг Истанбул шаҳридаги Бош консулхонаси ҳамда Миграция агентлиги ҳамкорлигида ватанга қайтарилди.
Маълум қилинишича, фуқаро ишлаш мақсадида Бурсага борган вақтида учинчи қаватдан йиқилиб, оғир тан жароҳати олган. У зудлик билан шошилинч тиббий ёрдам орқали шифохонага ётқизилган.
Ҳодисадан хабар топган Бурса шаҳридаги ўзбекистонлик кўнгиллилар жабрланувчининг даволаниши ва соғайишига кўмаклашиш мақсадида навбатчилик ташкил этган.
Шундан сўнг Ўзбекистоннинг Истанбулдаги Бош консулхонаси ҳамда Ўзбекистон Республикаси Вазирлар Маҳкамаси ҳузуридаги Миграция агентлиги ҳамкорлигида фуқаро Туркиядан Ўзбекистонга муваффақиятли олиб келинди.
Шунингдек, расмийлар жабрланувчига беғараз ёрдам кўрсатган Бурса шаҳридаги кўнгилли ватандошлар ҳамда “Ўзбек хотин-қизларининг ҳуқуқларини ҳимоя қилиш жамияти”га миннатдорлик билдирди.
