Фарғонада ҳужра ташкил этиб, вояга етмаганларга диний сабоқ берган шахс қўлга олинди
Унинг ойига 1,5 миллион сўм эвазига 8 нафар вояга етмаганга ноқонуний диний таълим бергани аниқланган.
Фарғона вилоятининг Олтиариқ туманида ноқонуний диний таълим бериш ҳолати аниқланди. Бу ҳақда вилоят Ички ишлар бошқармаси маълум қилди.
Қайд этилишича, “Хавфсиз ва соғлом юрт” кенг қамровли тезкор-профилактик тадбирлари доирасида вилоят ИИБ ҳамда Давлат хавфсизлик хизмати ходимлари ҳамкорлигида ўтказилган тезкор тадбирда 1991 йилда туғилган, Олтиариқ тумани Буғдойчи маҳалласида яшовчи фуқаро ўз хонадонида ноқонуний ҳужра ташкил этгани аниқланган.
Тергов маълумотларига кўра, у ҳар бир ўқувчидан ойига 1,5 миллион сўм ҳақ олиб, жами 8 нафар вояга етмаганга диний адабиётлардан ноқонуний сабоқ бериб келган.
Шунингдек, ҳужрада ташкил этилган таълим жараёнида вояга етмаганларга мунтазам равишда жисмоний ва руҳий тазйиқ ўтказилгани аниқланган. Тезкор тадбир давомида диний адабиётлар ва бошқа ашёвий далиллар расмий тартибда олиб қўйилган.
Мазкур ҳолат юзасидан гумонланувчига нисбатан Ўзбекистон Республикаси Жиноят кодексининг 229²-моддаси 2-қисми ҳамда 110-моддаси билан жиноят иши қўзғатилиб, унга нисбатан қамоқ эҳтиёт чораси қўлланилди.
Бундан ташқари, ҳужрада ноқонуний диний таълим олган вояга етмаганларнинг ота-оналарига нисбатан Маъмурий жавобгарлик тўғрисидаги кодекснинг 47-моддаси асосида маъмурий баённомалар расмийлаштирилган.
