Европаликларни чув туширган: Тошкентда яширин call-марказ аниқланди
Марказ хорижликларга сохта ҳужжатлар ва трейдинг бўйича тренинглар таклиф қилиб, криптоактивларини ўзлаштирган.

Тошкент шаҳрининг Яшнобод туманида хорижий фуқароларни алдаш орқали криптоактивларини ўзлаштирган 10 кишилик ноқонуний онлайн call-марказ фаолияти тўхтатилди. Бу ҳақда Тошкент шаҳар Ички ишлар бош бошқармаси матбуот хизмати хабар берди.
Дастлабки маълумотларга кўра, гуруҳ аъзолари мессенжерлар орқали Европа давлатлари фуқароларининг ишончига кириб, сохта ҳужжатлар тайёрлаш, трейдинг ва криптоактивлар бўйича тренинглар таклиф қилган. Шундан сўнг алдаш йўли билан уларнинг криптоактивларини ўзларининг электрон ҳамёнларига ўтказиб, ўзлаштирган.
Тезкор тадбир давомида 8 та ноутбук, 58 та телефон ва 3 та компьютер қурилмаси ашёвий далил сифатида олиб қўйилган. Шунингдек, гуруҳ аъзоларининг пойтахтда вақтинча рўйхатдан ўтмасдан яшаб келгани аниқланган.
Улар томонидан 231 134 USDT, яъни қарийб 2 миллиард 432 миллион сўмлик криптоактивлар айланмаси билан қонунга хилоф равишда шуғулланилгани маълум бўлган.
Мазкур ҳолат юзасидан Яшнобод тумани ИИО ФМБ томонидан Жиноят кодексининг 278-8-моддаси билан жиноят иши қўзғатилиб, тергов ҳаракатлари давом эттирилмоқда.








