ОТМ ва техникумларга кириш тест синовлари якунланди
Ўн кун давом этган имтиҳонларда 610 мингдан ортиқ абитуриент иштирок этди. Йўналиш танлаш 25 июлдан бошланади.
23 июль куни давлат олий ва касбий таълим муассасаларига қабул тест синовларининг сўнгги куни бўлиб ўтди. Билим ва малакаларни баҳолаш агентлиги маълумотига кўра, якуний кунда тест топшириши режалаштирилган 45 минг 520 нафар абитуриентнинг 45 минг нафардан ортиғи имтиҳонда қатнашган. Шу куни тартиб-қоидаларни бузганлар қайд этилмади.
Маълум қилинишича, ўн кун давомида тест синовларида қатнашиши белгиланган жами 664 минг 609 нафар абитуриентдан 610 минг нафардан ортиғи имтиҳонларда иштирок этган. Тест синовлари давомида тартиб-қоидаларни бузган 70 нафардан ортиқ абитуриент имтиҳон жараёнидан четлатилган.
Агентликнинг билдиришича, тест синовларининг ўнинчи куни натижалари 24 июль куни эълон қилинади. Шундан сўнг абитуриентлар 25 июлдан 8 августга қадар (шу куни ҳам) иккинчи босқич танловида иштирок этиб, олий таълим муассасаси, таълим йўналиши, таълим шакли ва устуворликларини танлаши мумкин.
Якуний мандат натижалари эса иккинчи босқич танлови якунланганидан кейин бир ҳафта ичида эълон қилинади.
