Туркман халқининг миллий етакчиси Шавкат Мирзиёевни таваллуд куни билан табриклади
Телефон мулоқотида Ўзбекистон–Туркманистон стратегик шериклиги, савдо-иқтисодий ҳамкорлик ва минтақавий кун тартибидаги масалалар муҳокама қилинди.
Президент Шавкат Мирзиёев 24 июль куни Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедов билан телефон орқали мулоқот қилди.
Суҳбат аввалида Гурбангули Бердимуҳамедов давлат раҳбарини таваллуд куни билан самимий табриклаб, мустаҳкам соғлик, бахт-саодат ва давлат фаолиятида улкан муваффақиятлар, қардош Ўзбекистон халқига эса тинчлик, фаровонлик ва равнақ тилади. Шунингдек, Туркманистон Президенти Сердар Бердимуҳамедовнинг самимий саломи ва эзгу тилакларини етказди.
Туркман халқининг миллий етакчиси Президент Шавкат Мирзиёев раҳбарлигида амалга оширилаётган кенг кўламли ислоҳотлар натижасида Ўзбекистон ижтимоий-иқтисодий ҳамда сиёсий тараққиётда муҳим ютуқларга эришаётганини алоҳида таъкидлади.
Мулоқот давомида олий даражада эришилган келишувлар ижроси, Ўзбекистон ва Туркманистон ўртасидаги дўстлик, яхши қўшничилик ҳамда стратегик шериклик муносабатларини янада ривожлантириш масалалари муҳокама қилинди.
Томонлар ўзаро савдо ҳажми ва юк ташиш кўрсаткичлари изчил ортиб бораётганини, «Шовот–Тошҳовуз» савдо зонаси фаолияти ҳамкорликни кенгайтиришга хизмат қилаётганини қайд этдилар. Энергетика, саноат, қишлоқ ва сув хўжалиги ҳамда транспорт соҳаларидаги қўшма лойиҳалар муваффақиятли амалга оширилаётгани таъкидланди.
Шунингдек, парламентлараро, ҳудудлараро, ишбилармонлик ва маданий-гуманитар алоқаларни янада ривожлантириш, шунингдек, жорий йил кузда Аваза шаҳрида ўтказилиши режалаштирилган Марказий Осиё ва Озарбайжон давлат раҳбарларининг навбатдаги Маслаҳат учрашуви юзасидан ҳам фикр алмашилди.
