Украина дронлари Санкт-Петербургга ҳужум қилди
Ҳужум ортидан шаҳарда дрон таҳдиди эълон қилиниб, мобил интернет фаолияти чекланиши ҳақида огоҳлантириш берилди.
24 июлга ўтар кечаси Украина дронлари Россиянинг Санкт-Петербург шаҳрига ҳужум қилди. Бу ҳақда шаҳар губернатори Александр Беглов маълум қилди.
Унинг сўзларига кўра, ҳаво ҳужумидан мудофаа тизимлари ҳужумни қайтаришда давом этган. Дрон зарбалари оқибатида Москва шоссеси ҳудудидаги фуқаролик инфратузилмаси объектларига зарар етган, ҳодиса оқибатларини бартараф этиш ишлари олиб борилмоқда.
Беглов фавқулодда вазият бўйича тузилган штаб фаолиятини шахсан бошқараётганини билдирган.
Ҳужум фонида Санкт-Петербургда дрон таҳдиди эълон қилиниб, аҳолига мобил интернет хизматида узилишлар кузатилиши мумкинлиги ҳақида огоҳлантириш берилган.
Шунингдек, хавфсизлик нуқтаи назаридан Пулково аэропорти фаолияти вақтинча тўхтатилган. Кейинчалик Россия Федерал ҳаво транспорти агентлиги (Росавиация) аэропорт одатдаги иш режимига қайтганини маълум қилган.
Ленинград вилояти губернатори Александр Дрозденко маълумотига кўра, ҳужум вақтида вилоят осмонида 50 та дрон уриб туширилган. Россия расмийлари ҳужум оқибатлари ва етказилган зарар юзасидан маълумотларни аниқлаштиришда давом этмоқда.
